Psa 74 | YomNWM | STEP | Nkunga Asafi. Bila mbi wutulozidi mu zithangu zioso, a Nzambi e ? Bila mbi wufuemini minkangu miaku mi mamemi miomi weti dikila e ?

Psalms 74

Maniongo mu diambu di buangu kinlongo kitiolomono.

Nkunga Asafi.

1 Bila mbi wutulozidi mu zithangu zioso, a Nzambi e ?
Bila mbi wufuemini minkangu miaku mi mamemi miomi weti dikila e ?
2 Tebukila batu baku moyo ;
bobo wukibakila thama ;
dikanda di kiuka kiaku, diodi wukula.
Mongo wu Sioni, koko wuvuanda.
3 Balula zithambi ziaku ku ndambu bibuangu
bitiolumunu mu mvu ka mvu.
Zimbivusu zioso ziozi mbeni kavanga mu buangu kinlongo.
4 Batu balendidi balembo vomi
va buangu kioki wutudenginina ;
batula bidalapo biawu banga dimbu ki ndungunu.
5 Badi banga batu bannanguna
soka mu zenga minti ku nsitu widi khoba.
6 Bakosikisa mabaya moso momo bamana fikula
mu bisoka biawu ayi zi malito ziawu.
7 Bazinisa buangu kiaku kinlongo mu mbazu ;
basumuna buangu kieti vuandanga dizina diaku.
8 Babedi tubanga mu mintima miawu : “Tuela kuba kosikisa mvimba”
Bazinisa mu mbazu bibuangu bioso biobi beti buongimina Nzambi mu tsi.
9 Bakadi kutumonisa kadi kumu kimosi
kusiedi mimbikudi ko.
Kadi mutu wumosi mu beto zebi keni
nate thangu mbi mama mela tatamana bela e ?
10 Nate thangu mbi mbeni kela kusekinina, a Nzambi e ?
Nate thangu mbi mutu wundendidi kela lenzilanga
dizina diaku mu zithangu zioso e ?
11 Bila mbi kangidi koko kuaku,
koko kuaku ku lubakala e ?
Bonga kuawu mu mimfutu mi kukhutu kiaku ayi wuba bungi.
12 Vayi ngeyo Nzambi, ngeyo ntinu ama tona muna tona ;
ngeyo weti nata phulusu va ntoto.
13 Keti ngeyo wuvasa mbu mu lulendo luaku ;
wukosikisa mintu mi bisimbi bi minlangu ;
14 keti ngeyo wukosikisa mintu mi Leviatani ^{▼▼Leviatani : Simbi ki nlangu kidi tsambuadi di mintu.},
wumvana banga bidia kuidi bibulu bi dikanga
15 Keti ngeyo wuzibula zitho zi minlangu ayi mimvuila mi minlangu
Ngeyo wusikisa minlangu minneni
miomi mieti kumba mu zithangu zioso.
16 Ngeyo vuidi muini, ayi ngeyo vuidi builu ;
ngeyo wuvanga ngondi ayi thangu.
17 Keti ngeyo wumana vanga zindilu zioso zi ntoto,
ngeyo wuvanga tsungi yi muini wu ngolo
ayi yi kiozi kingolo.
18 Tebuka moyo buevi mbeni kalembo sekinina, a Yave,
buevi bivungisi balenzila dizina diaku !
19 Kadi yekula luzingu lu dibembi diaku kuidi bibulu bi nganzi
ayi kadi thumbu zimbakana luzingu lu batu
baku badi mu phasi.
20 Bengudila Nguizani aku thalu ;
bila bisuamunu biyindulungu makhemi bifulukidi
mu bibuangu bitombi bi ntoto.
21 Kadi tala ti mutu wuyamusu
kavutuka mu tsoni
Bika nkua kiadi ayi nsukami
bazitisa dizina diaku.
22 Telama a Nzambi ! Wukinungisa !
Tebukila moyo buevi bivungisi bilembo sekinina
mu bilumbu bioso.
23 Kadi zimbakana biyoko bi bambeni ziaku
divunzi di bambeni ziaku, diodi dilembo
buelamanga thangu ka thangu.